【 青春真係可以常駐？】
有個客話要請茶水間助理，人工9,800，聽落冇乜問題係咪? 不過佢話要45歲以下; 另一個客話要請開發部經理，有Degree，最少15年經驗，其中10年要係Management Level(管理階層程度)，都好合理吖，最後佢話唔好老過40歲。
其實呢......45歲以下做保安都萬幾蚊啦，邊個會做9,800茶水阿姐呀? 至於開發部經理，大學畢業有Degree都廿幾歲啦，15年經驗，數數手指咪三到尾近四張嘢囉，當中仲要10年管理階層程度，即係30歲嗰陣就坐正做緊經理，呢條友一定要好長進，理論上攞咗傑青架喇。
職場上針對年齡嘅要求，封殺咗好多有能力嘅人， 唔通返去怪責阿爸阿媽太早食禁果咩！就算個客唔用獵頭公司搵人，佢自己收到份cv都一樣唔會請，其實我好想問呢啲客，你哋係咪唔會老架? 如果有一日你哋老咗，又係咁樣俾人封殺同歧視，你會點呀? 還是你好肯定自己會英年早逝，所以唔使面對呢個問題？
最近有單新聞，話韓國一間網絡內容監控公司
EverYoung，專請55歲以上嘅人仕，目前全公司有420個員工，最老嗰位82歲，老闆鼓勵員工每做一個鐘就休息10分鐘，真係好值得讚賞。
希望香港有更多公司會效法EverYoung，放寬年齡方面嘅門檻，唔好再用出生年份去定奪請唔請一個人，大家都有老嘅一日， 冇人可以違抗定數，青春亦唔會常駐，作為老闆可唔可以人性化少少，唔好學歲月咁無情呢?
職場信件懶人包：https://goo.gl/7dXtP2
Search